Hött-e Philosophie
Gern stellt de Skiclub und de Vorstand sini Vorstellige und Grundätz für es gmüetlichs und gselligs Höttelebe i de Bumoos vor:
1. Alli sind jederziit Willkomme
Ob Summer oder Winter isch d Hötte für d Mitglieder vom Club do. Gern chönd ihr jederziit (Summer, Winter, unter de Wuche, Wuchenend) mit eme Mail oder SMS an Höttechef Adi d Hötte reserviere und e cooli Ziit i de Bumoos verbringe,
2. De Lift lauft = d Bumoos lauft
Wenn de Skilift lauft und Gäst beförderet erwartet de Vorstand vom Höttewart, dass au d Hötte offe isch und z’Trinke und öppis chliises z’Esse abütet.
Wenn de Skilift im wohlverdiente «Frei» isch dörfed ihr d Hötte gern bsetze/bruuche und es söll sich keine verpflichtet fühle zum au Gäst z bediene.
3. Hött-de Wart isch Hött-de Chef
De Höttewart het schlussendlich d Verantwortig fürs füehre vo de Bumoos. Dezue ghöred Verantwortlichkeite und Pflichte aber au gwüssi Recht im Rahme vo dere Philosophie.
Zum Bispiel söll/mues er ame Gast verständlich mache wenns Ziit isch zum goh oder sich en Gast denebet
benimmt. D Sicherheit vom Gast und de Bahne het immer Vorrang vor em allenfalls no vorhandene Durscht.
4. S Pistefahrzüg isch de stärcher
Anschinend sölls ab und zue vorcho, dass gwüssi Gäst chli länger sitzed und drum d Pistefahrzüg scho unterwegs sind.
Es git Skifahrer wo i de Vergangeheit probiert hend sich gege d Pistefahrzüg und/oder ihri Winde/Ankerseil z’stelle. Bis jetzt hend alli Skifahrer verlore!!!
Es giltet bi sotige Aktione ABSOLUTI Lebensgfahr!!!
Vom Club und Vorstand wird drum JEGLICHI Haftig abglehnt und es wird vom Höttewart verlangt, dass er alli Gäst usdrücklich druf hiwiiset.
5. Wer nöd cha laufe chan nöd i jedem Fall fahre
Sött en Gast sini Uhr dihei vergesse ha und drum echli sehr tüüf im Glas denoh sueche stohts am Höttewart frei ihm/ihre en Schlofplatz i de Hötte azbüte. Wenn das jedoch unzuemuetbar isch für de Höttewart stohts im im Extremfall au frei zum d Pisterettig oder anderi Behörde ischalte.
6. De nöchscht chas viellicht doch nöd bruuche
Es chunnt immerwieder vor, dass en Höttewart in beschter Absicht öppis i de Hötte loht i de Meinig, dass de nöchscht Höttewart das denn gern chan ufbruche.
Das isch zwor lieb gmeint füehrt aber meischtens dezue, dass sich Reste ahüfed und mir bim Hötteuusruume abglaufni Lebensmittel und agfangni Reste müend entsorge. Jede Höttewart nimmt sin Znacht selber mit und mir bitted eu drum was ihr mitbringed au wieder mit Hei z’neh.
7. I gange wie i chume
Frei nach em Motto «ich verlasse die Hütte so wie ich sie gerne selber antreffe!» Bitte haltet eu strikt ad d’Checklischte wo a de Hötte-Türe hanget und kontrolliered zweimol ob alli Pünkt suuber abgarbeitet sind! De nöchscht wird’s eu Danke.
De Vorstand dankt ganz herzlich fürs Ihalte vo den eifache aber wichtige Regle damit mir no vieli wiiteri gmüetlichi Stunde ide Bumoos mit eu und vielne Bsuecher dörfed gnüsse!!